CUAC FM emitirá o vindeiro 3 de agosto, de 19:00 a 21:00 horas, un programa especial en directo dedicado por completo ao XXXIX Festival Noroeste Estrella Galicia. O espazo repasará os horarios e recomendará os concertos que non hai que perder entre os máis de 40 recitais que se celebrarán do 5 ao 9 de agosto na Coruña.
CUAC FM súmase á recta final da conta atrás para o XXXIX Festival Noroeste Estrella Galicia cun programa especial en directo. O luns 3 de agosto, de 19:00 a 21:00 horas, a emisora dedicará dúas horas de emisión monográfica a analizar o cartel completo desta edición e a recomendar á audiencia os concertos que mellor encaixan cos seus gustos.
O festival, que se celebrará do 5 ao 9 de agosto de forma gratuíta en sete emprazamentos da cidade —Campo da Leña, praza de Azcárraga, praza de María Pita, Santa Margarida, Castelo de San Antón, O Portiño e a praia de Riazor—, reúne máis de 40 concertos de estilos tan variados como o rock, a música africana, o pop, a electrónica, o folk, o jazz, o rythm&blues, o post-punk ou o flamenco. Máis da metade das bandas participantes son galegas.
Entre as citas que centrarán boa parte da análise en CUAC FM destacan as actuacións de Tsunami Arise e Apolo18, gañadores do XXVIII Concurso de Bandas e Solistas de CUAC FM, que tocarán o 6 de agosto no Campo da Leña ás 23:00 horas e en Azcárraga ás 13:00 horas, respectivamente.
A programación arrinca o 5 de agosto con nomes como Law, David Regueiro Trío ft. Pablo Castaño, Pamela Rodríguez e Fantastic Negrito en Azcárraga; Colorado, Greasy Belly, Agoraphobia e Frankie and the Witch Fingers no Campo da Leña; Freestyle People ft. Gallos del Norte, Orquesta Invisible, Catuxa Salom e Bongeziwe Mabandla en Santa Margarida; e Ángel Stanich, Dorian, Familia Caamagno e a Orquestra do Quince en María Pita, ademais de Anna Andreu no Castelo de Santo Antón.
O 6 de agosto seguirá con Apolo18, MFC Chicken, La Perra Blanco e Moura en Azcárraga; Mar de Fondo, MEU, Tsunami Arise e Ruxe Ruxe no Campo da Leña; Banda DiversidArte ft. Silvia Penide & La Sophie Simonds Band, Mounqup, Xosé Lois Romero & Aliboria e Mari Froes en Santa Margarida; e Vicente Calderón e Yerai Cortés en María Pita, xunto a Ana Lua Caiano no Castelo de Santo Antón.
A praia de Riazor acollerá os grandes concertos de peche de fin de semana: o venres 7 de agosto, con Crowded, Bala, Sprints e Rusowsky; e o sábado 8 de agosto, con Zënzar, Sés, Echo & The Bunnymen e Bomba Estéreo.
O programa especial de CUAC FM servirá así de guía para o público que queira planificar a súa axenda do festival, cunha lectura das propostas máis destacadas de cada xornada e escenario.