O programa en directo recolleu as voces da universidade, das institucións e das empresas galegas participantes nesta primeira edición.
O pasado 29 de outubro, CUAC FM emitiu en directo dende o Pavillón de Deportes do Campus de Elviña un programa especial con motivo da feira de emprego e emprendemento UDC Talento, organizada pola Universidade da Coruña. Agora, o espazo completo xa está dispoñible en formato podcast para volver escoitar todas as entrevistas, conexións e momentos destacados dunha xornada chea de talento, innovación e oportunidades. A emisión especial tamén contou con directo en CUAC TV durante as máis de dúas horas que durou o programa.
As voces do talento galego
Durante dúas horas de emisión, o equipo de CUAC FM conversou cos principais protagonistas desta feira pioneira: Ricardo Cao; Reitor, representantes da Universidade da Coruña, con María José Lombardía; Vicerreitora de Estudantes e Empregabilidade, do Concello da Coruña, da Rede de Polos de Emprendemento e Apoio ao Emprego da Xunta de Galicia, e con empresas como FINSA, Innogando, Navantia, Cogami… O programa tamén contou con conexións en directo das reporteiras da emisora, que recolleron as impresións do público, estudantes e emprendedores presentes nos espazos Impulsa-T, Activa-T e Coñece-T.
Unha mirada ao futuro do emprego e o emprendemento
As entrevistas abordaron temas como as oportunidades laborais para o estudantado universitario galego, o papel das empresas na innovación e na sustentabilidade, o apoio institucional ao emprendemento e á creación de proxectos locais, e a importancia de conectar universidade e tecido produtivo. Unha radiografía completa do presente e futuro do emprego xuvenil en Galicia, contada polos seus verdadeiros protagonistas.
Escoita o podcast
1×1 UDC Talento
Podes escoitar o programa completo de “UDC Talento” dende a web de CUAC FM. 👉 Escoita o podcast aquí