CUAC FM emitirá este sábado 20 de decembro, de 16.00 a 18.00 horas, un programa especial en directo titulado Mulleres e Motor, unha proposta radiofónica que visibiliza o papel das mulleres no mundo da competición e do deporte do motor. O especial está producido polo equipo do programa SKPMotor, que habitualmente se emite os xoves de 23.00 a 24.00 horas, e contará cunha duración excepcional de dúas horas en rigoroso directo.
Este programa especial estará dedicado ás mulleres que compiten ou participan activamente en diferentes disciplinas do motor, desde os rallys ata o motocross, o karting ou o autocross, destacando tanto a súa traxectoria deportiva como o seu papel fundamental dentro do sector.
Rallys, autocross, karting e motos
No ámbito dos rallys, participarán destacadas copilotas como Andrea Lamas, subcampioa de Rallys de Terra 2025; Evelín Solares, Sandra Amaro, Raquel Triñanes e Melisa Lorenzo, campioa da Copa Hyundai i20N S-CER; así como Fátima Ameneiro, campioa de Europa do TER. O programa contará tamén coa presenza de Silvia Costilla, comisaria en rallys, autocross e participante no Dakar 2025.
O autocross estará representado polas pilotos Bea Varela, Sandra García, Yesi Lorenzo e Laura Lista.
No karting, a protagonista será a moza de Culleredo Aroa Fernández, campioa da categoría mini novel na Supercopa da FGA e segunda clasificada no Campionato Galego de Karting.
O mundo das motos terá unha ampla presenza con Aroa Castromán (motocross), Elena López, subcampioa de España de Cross Country, Noa Pazo (VF Timing), Lucía Luaces (enduro), Uxía Rodríguez, mecánica no Mundial de Moto3, Uxía Camiña (enduro e circuíto) e Sandra Fernández, cronometradora e organizadora do Campionato VF Timing en Galicia.
Como escoitar o especial
O especial Mulleres e Motor poderá seguirse en directo a través do 103.4 FM na Coruña, no directo da web de CUAC FM e tamén mediante o directo de Facebook do programa.
Unha cita imprescindible para coñecer de primeira man o talento, o esforzo e a paixón das mulleres que están a facer historia no motor.