A nova tempada en CUAC FM arrincou marcada por unha das noticias máis duras do verán: a vaga de incendios forestais que arrasou Galicia durante xullo e agosto. Varios programas da emisora comunitaria dedicaron espazo a analizar a magnitude da traxedia, a resposta institucional e as consecuencias ambientais e sociais dun fenómeno que xa se considera histórico pola súa gravidade.
Segundo os datos do sistema europeo Copernicus (EFFIS), no que vai de 2025 arderon en Galicia 144.997 hectáreas, o que supón arredor do 4,9% do territorio galego. A Xunta de Galicia manexa unha cifra algo menor, próxima ás 120.000 hectáreas, pero en calquera caso falamos do verán máis negro en décadas.
A Rede Natura, unha das grandes vítimas
Un dos aspectos máis preocupantes é a enorme afección aos espazos protexidos. Segundo fixo público ADEGA, durante a vaga de lumes de agosto queimáronse 37.819 hectáreas dentro da Rede Natura 2000, o que equivale ao 10,8% do total destes espazos en Galicia. É a maior afección rexistrada desde a implantación desta figura de protección no ano 2004.
Os datos amosan que os incendios impactaron nos espazos protexidos cunha intensidade 2,2 veces superior á do resto do territorio galego. Isto deixa cifras alarmantes: máis da metade do Bidueiral de Montederramo ardeu (56,8%), igual que boa parte do Macizo Central (52,4%) e zonas moi significativas de Pena Trevinca (20,3%), Pena Maseira (14,8%) ou a Serra da Enciña da Lastra (7,5%). Tamén os Ancares e o Courel sufriron os incendios máis graves da súa historia, con 5.389 hectáreas arrasadas.
Consecuencias sociais e ambientais
O impacto ambiental é devastador: perda de biodiversidade, destrución de hábitats, danos irreversibles en ecosistemas únicos e unha forte erosión do solo que compromete a recuperación. Ao mesmo tempo, moitas aldeas e núcleos poboacionais víronse ameazados polas lapas, obrigando a evacuacións e deixando tras de si unha fonda sensación de vulnerabilidade.
A vaga de incendios tamén puxo en evidencia as debilidades do sistema de prevención e extinción, nun contexto marcado polo cambio climático, a seca extrema e as altas temperaturas. Ademais, a Xunta recoñeceu que unha parte moi significativa dos lumes tiveron orixe intencionada.
A análise en CUAC FM
Estrelados na Estratosfera e Velaí Vai comezaron a temporada dedicándolle tempo á vaga de incendios que Galicia sufriu este verán. Os Estrelados falaron no primeiro programa con Mateo Pasantes, enxeñerio forestal, e no episodio 2 conversaron con Juan Fariñas, profesor da UDC e bombeiro profesional. Velaí Vai pola súa parte dedicaron o seu primeiro episodio a falar con Carlos Rocha, bombeiro forestal con base en Carral e que estivo nos incendios de Chandrexa de Queixa.
Escoita os nosos programas sobre os incendios en Galicia
A continuación, tres episodios recomendados dos programas de CUAC FM que comezaron a temporada abordando a vaga de incendios deste verán.
2×1 Incendios En Galiza: A Visión Dun Enxeñeiro Forestal
Tras un verán de horror no que se bateron récords arrepiantes, tratamos de comprender a realidade dos nosos montes e o que está a acontecer neles da man de un experto xa coñecido no programa: o enxeñeiro forestal Mateo Pasantes. Analizaremos as medidas que se están a levar acabo e cales se deberían implementar, os bulos que circulan por redes e medios, ademais das actuacións políticas e os seus límites.
3×1 Carlos Rocha: Bombero Montañero
Velaí Vai é un programa de entretemento que ofrece unha mistura de humor, actualidade e reflexións sobre a vida cotiá. Tertulias sobre temas diversos, xogos, preguntas e experiencias persoais. ¡Únete a nós para unha dosis de perspectiva en cada episodio de Velaí Vai!
2×2 Incendios En Galiza: A Visión Dun Bombeiro Profesional
Durante este pasado verán, o lume estivo moi presente na Galiza. O desastre foi de unha magnitude cuxas cifras poñen medo. Mais estas poderían ser moito peor se non fora pola intervención dos bombeiros. Estes heroes non soen falar, pero nos tivemos a sorte de convencer a Juan Fariñas, bombeiro profesional, que nos ven a ensinar sobre a realidade desta profesión. Dende como se chega a estes postos e o seu duro adestramento até a entrada en acción nos momentos críticos, pasando polas complexas relacións coa administración pública.
