A Radio Comunitaria da Coruña, CUAC FM 103.4, comeza a súa trixésima tempada radiofónica con máis forza ca nunca e cunha cifra redonda que dá boa mostra da súa vitalidade: 501 programas emitidos ao longo da súa historia. A emisora universitaria, que leva tres décadas emitindo dende o Campus da Zapateira, prepara unha serie de actos para celebrar o seu 30 aniversario e convida a toda a cidadanía coruñesa a participar.
O momento central destas celebracións será o sábado 21 de marzo, cunha foto colectiva ás 13:04 horas na Praza de María Pita, un aceno ao número do seu dial, e unha gran cea-baile no Hotel Meliá María Pita, aberta a todas as persoas que, dalgún xeito, formaron parte da familia de CUAC FM.
A emisora quere que esta cita sexa un reencontro entre xeracións, un espazo de celebración e agradecemento á veciñanza coruñesa, ás institucións locais e a todas as persoas que fixeron posible manter viva a radio comunitaria durante trinta anos. Non en van, CUAC FM atravesou momentos complicados, como o expediente sancionador da Xunta de Galicia que podería ter suposto unha multa de ata 200.000 euros por emitir sen licenza. A mobilización social e o apoio institucional foron clave para que o caso rematase cunha vitoria histórica no Tribunal Supremo, recoñecendo o dereito da radio comunitaria a emitir.
Queres asistir á cea do 30 aniversario?
O 21 de marzo celebramos unha gran cea-baile no Hotel Meliá María Pita. Se fixeches programa en CUAC FM ou formaches parte ou formas parte da asociación non perdas esta celebración. Inscríbete agora!
Inscribirme na ceaO 2026 será, sen dúbida, un ano histórico para CUAC FM e para a comunicación comunitaria en Galicia. A Rede de Medios Comunitarios (ReMC) xa anunciou que celebrará na Coruña o seu Encontro e Asemblea anual para acompañar o aniversario da emisora. Así que toma nota: 21 de marzo, 13:04, Praza de María Pita. A historia da radio comunitaria coruñesa faise foto… e festa!