Radio Barrio
En Cuac FM, como emisora comunitaria que somos, interésanos a radio de proximidade. Con Radio Barrio queremos dar a coñecer e facer visible o traballo de moitos e moitas artistas que existen nos barrios e fomentar a cultura da cidade. Temos creadores na porta do lado que probablemente non coñezamos. Así que, por unha banda, queremos poñer en contacto aos creadores coa súa veciñanza, e viceversa.
Pero ademais queremos facer algo experimental e estimulante onde os axentes culturais serán os encargados de facer o programa, buscando a hibridación, sacando a xente da súa zona de confort, poñendo a radio como xoguete e deixando que os artistas poñan a imaxinación. E a ver que sae.
Radio Barrio é un proxecto de Cuac FM dentro do plan #CulturaDeBarrio da Concellaría de Culturas do Concello da Coruña coa colaboración do IMCE. Será levado a cabo nos centros cívicos de Monte Alto, San Diego e Ágora.