CUAC FM inaugura a súa nova tempada radiofónica cun evento de humor en directo protagonizado por Vellenials (e amizades), o sábado 10 de outubro no Auditorio de Afundación da Coruña, dentro dos actos do 30 aniversario da emisora.

CUAC FM, a radio comunitaria da Coruña, dá o pistoletazo de saída á súa nova tempada cun evento especial de humor en directo. Baixo o título “Noitiña de risas con Vellenials… e moito máis”, a cita terá lugar o sábado 10 de outubro, ás 20:00 horas, no Auditorio de Afundación, no Cantón Grande da Coruña.

Vellenials é un dos programas da grella de CUAC que está a piques de estrear a súa 6ª temporada en emisión. Nesta ocasión, o seu equipo sae do estudio para ofrecer unha noite de humor en directo ante o público, nun espectáculo que promete risas e sorpresas ao longo da velada.

O evento enmárcase na celebración do 30 aniversario de CUAC FM, un feito que a emisora está a conmemorar ao longo da tempada. CUAC FM é a radio comunitaria da Coruña, declarada entidade de utilidade pública, que leva tres décadas de emisión en formato asociativo e sen ánimo de lucro. CUAC Fm emite na 103.4 FM para toda a cidade da Coruña e para todo o mundo desde a súa app gratuita e sen publicidade.

A entrada ao evento é gratuíta, aínda que require retirada previa de convite. Os convites poderán conseguirse a través da plataforma online Ataquilla a partir do domingo 4 de outubro.

O acto conta coa colaboración do Concello da Coruña.

CUAC FM emitiu onte, mércores 12 de agosto, un especial en directo dende o Monte da Fraga con motivo da eclipse solar total vivida na Coruña. Entrevistas, música e a experiencia única do momento de totalidade xa están dispoñibles en vídeo para quen queira revivilo ou descubrilo por primeira vez.

CUAC FM emitiu onte, mércores 12 de agosto, o seu Especial Eclipse Total, un programa en directo dende o Monte da Fraga que acompañou á cidade da Coruña durante a eclipse solar total, coa colaboración da Universidade da Coruña e da Deputación da Coruña.

Ao longo de tres horas de emisión, o programa contou coa participación de diversos convidados e convidadas: o cosmólogo galego Antón Baleato, o músico Carlos Núñez, o reitor da UDC Ricardo Cao, o delegado da AEMET en Galicia Francisco Infante, e Begoña Duro, secretaria da Agrupación IO, ademais de acompañar en directo o momento da eclipse total. O programa contou ademáis con seccións de mitoloxía, humor e as conexións dos reporteiros por toda a cidade.

Quen non puido seguir a emisión en directo, ou quen queira revivir algún momento en concreto, xa pode facelo a través do vídeo completo do programa ou escoitar o podcast na web ou na app de CUAC FM.

30 Aniversario CUAC FM

1×34 Especial Eclipse Total

Programa especial emitido dende o Monte da Fraga, no campus da Zapateira, con motivo da eclipse total do 12 de agosto de 2026.

0:00 / 0:00

A Coruña vivirá o próximo 12 de agosto un dos fenómenos astronómicos máis esperados da década: unha eclipse solar total, cunha fase de totalidade duns 76 segundos e o momento máximo previsto arredor das 20:28 horas. CUAC FM, no marco do seu 30º aniversario, emitirá un especial en directo dende o Monte da Fraga para acompañar este acontecemento.

CUAC FM emitirá un programa especial en directo con motivo da eclipse solar total que se poderá observar dende A Coruña o próximo 12 de agosto. A emisora, que este ano celebra o seu 30º aniversario, quere achegar este fenómeno á audiencia cun especial que combine información astronómica e a experiencia en directo do momento de totalidade.

O especial emitirase dende o Monte da Fraga, en horario de 18:00 a 21:00 horas, dúas horas de directo ininterrompido arredor do momento máximo da eclipse. O programa contará con persoas convidadas, poesía, percorrerá tamén o lado máis mitolóxico do fenómeno e terá conexións en directo dende distintos puntos da cidade para coñecer como se vive a eclipse en cada un deles. Ademais, quen o desexe poderá seguir o especial tamén en vídeo. Todo isto grazas á colaboración inestimable da Universidade da Coruña, que fai posible esta emisión especial. A audiencia poderá participar no programa a través de WhatsApp, no número 644 737 303.

CUAC FM recorda que, para observar directamente o sol antes e despois da fase de totalidade, é imprescindible empregar filtros solares homologados, xa que mirar directamente ao sol sen protección adecuada pode causar danos oculares graves.

A radio comunitaria da Coruña celebrou o sábado 13 de xuño a gala dos seus Premios OSCUACS, os galardóns máis sinceramente amañados da historia da radiodifusión, no auditorio de Afundación no Cantón Grande. Ante un público entregado e coa colaboración do Concello da Coruña, CUAC FM reuniu a toda a súa familia para recoñecer, entre risas e emoción, o traballo voluntario de quen fai posible 30 anos de radio libre e independente na Coruña.

A gala dos OSCUACS é, por definición, a cerimonia de premios onde todo o mundo sabe que hai tongo. E precisamente aí reside a súa maxia: o importante non é ser mellor que ninguén, senón xuntarse a celebrar o que se constrúe colectivamente. Este ano, no marco do 30 aniversario da emisora, a festa adquiriu unha dimensión especial.

Entre os grandes protagonistas da noite destacaron tres programas que representan ben a diversidade da grella de CUAC FM. Malhumorhadas, que se alzou co galardón ao Mellor Programa, é un espazo de sociedade e cultura que, con oito tempadas ás costas, combina humor, música e compromiso con proxectos e movementos sociais. Nubes de Papel, recoñecido como o Programa Mellor Dirixido, é un percorrido polo mundo literario, a pintura, a escultura e a música da Coruña, cunha proposta que leva máis de dez tempadas dando voz á cultura local. E Cuak and Roll, Mellor Programa Musical, é un clásico xa das ondas comunitarias da cidade, un espazo que foxe das radioformulas para achegar ao público unha ampla diversidade de xéneros: rock, blues, country, soul, folk, punk ou heavy metal, entre outros.

A noite tivo un dos seus momentos máis aplaudidos coa actuación sorpresa do coro Somos Voces Coruña, con Marian Ledesma como cantante solista e Anxo Seco ao piano, que puxeron a emoción que só a música en directo é capaz de ofrecer.

Palmarés completo dos OSCUACS 2026

CUAC FM celebra os seus 30 anos cunha maratón de radio de 30 horas en antena

CUAC FM conmemora o seu 30º aniversario cun maratón de radio de 30 horas ininterrompidas en emisión, con inicio o sábado ás 15:00 horas e remate o domingo pola tarde. Máis de vinte programas da emisora coruñesa participan nesta cita especial, que combina música, entrevistas, ficción sonora, humor e análise mediática nunha das emisións máis ambiciosas da historia da emisora.

A maratón arrinca o sábado ás 15:00 coa presentación do evento e a incorporación de Mi Rollo es el Rock. Ás 16:00, ninputaidea! ofrece un programa concentrado con presentacións de discos novos, cómics, lectura, a presentación dun libro e unha entrevista a unha banda de Barcelona, ademais dunha ollada ao que supuxo para o equipo a súa traxectoria en CUAC FM.

Ás 18:00 chega un dos momentos máis singulares da programación: Ulalume regresa ás ondas tras 25 anos de silencio radiofónico para traer historias arredor do 30º aniversario da emisora, acompañadas de música. Ás 20:00, Music Box recolle o testigo cunha entrega especial na que, despois de 14 anos, volve soar Edgar Cal, produtor e DJ coruñés. Pechando a noite do sábado, Ecuación (21:00) conversa cun profesor de conservatorio e cun chelista-astrofísico, e Loco Iván (22:00) mergúllase nos espectros, tanto o radioeléctrico —indisociable da actividade radiofónica— como calquera outro tipo de presenza espectral.

A madrugada do domingo acolle, entre outras propostas, Tá-se bem na rádio ás 2:00, con dúas horas de análise da actualidade dos medios de comunicación nun formato especial de horario nocturno. Ás 8:00, Music Box regresa cunha segunda entrega a cargo de Iván Pérez, quen mestura en directo versións electrónicas actuais de música procedente de radios españolas das décadas de 1970 a 2000. Ás 9:00, TRECÉPOLIS propón unha nova etapa da súa viaxe sen etiquetas polas músicas do mundo, con escalas en Mali, Islandia e Jamaica, entre outras. Ás 12:00, Radio Parafuso dedica o seu espazo a entrevistas con locutores de programas históricos de CUAC, con especial atención á saúde mental, ao agradecemento e á memoria colectiva da emisora.

A maratón conclúe o domingo pola tarde cun tramo que inclúe Spoiler (16:00), Sueños Diabólicos (17:00), Recendo (18:00) e Nubes de Papel (20:00). A audiencia poderá participar e enviar mensaxes de felicitación e agarimo para a emisora usando o Whatsapp ou Telegram do 644 737 303.

Programación completa

Sábado

Domingo

O taller “IA aplicada á radio comunitaria”, celebrado no marco do ReMCuentro 26, serviu de escenario para que CUAC FM presentase os seus proxectos de intelixencia artificial en activo: a transcrición automatizada de podcasts con modelos de código aberto, unha ferramenta experimental de busca semántica no arquivo histórico da emisora, novas utilidades de xestión interna e o desenvolvemento dunha nova versión da app oficial.

O Encontro Estatal de Medios Comunitarios da ReMC, celebrado na Coruña entre o 17 e o 19 de abril de 2026 e organizado por CUAC FM con motivo do seu 30 aniversario, acolleu entre as súas actividades o taller práctico “IA aplicada á radio comunitaria”. A sesión, impartida por Chema Casanova, Fernando Souto e Isa Lema —membros da propia emisora— combinou demostracións en directo, reflexión crítica sobre o impacto destas tecnoloxías e un espazo de debate entre representantes de emisoras de todo o Estado.

Máis aló dos contidos de carácter xeral dirixidos ás emisoras participantes, o taller constituíu tamén un punto de presentación dos proxectos que CUAC FM ten en marcha na área da intelixencia artificial. A emisora traballa actualmente na transcrición automática dos seus podcasts mediante modelos de código aberto —open source—, co obxectivo de mellorar a accesibilidade dos contidos sonoros e facilitar o seu aproveitamento a persoas con dificultades auditivas ou con preferencia por formatos de texto. Todo isto feito en local e sen depender de grandes corporacións.

Un dos proxectos de maior alcance anunciados durante a sesión é o desenvolvemento dunha ferramenta de busca semántica sobre o arquivo sonoro da emisora, que permitirá localizar calquera contido dentro dos episodios emitidos ao longo de case toda a historia de CUAC FM. A ferramenta abre a posibilidade de recuperar e poñer en valor décadas de produción radiofónica propia. Ademais, a emisora está a desenvolver utilidades de traballo interno orientadas a mellorar a xestión dos procesos da emisora e da programación.

A coordinadora de tecnoloxía de CUAC FM traballa tamén nunha nova versión da app oficial da emisora, que incorporará melloras e novas funcionalidades respecto á versión actual, dispoñible para Android e iOS.

Estes proxectos sitúanse na continuidade dunha traxectoria de innovación tecnolóxica que CUAC FM mantén dende as súas orixes. A emisora desenvolveu RadioCo, un sistema de gravación automatizada de programas e xeración de podcasts que é referencia no sector das radios comunitarias, e publicou a súa primeira app móbil coincidindo co seu 15º aniversario, considerada unha das primeiras aplicacións radiofónicas de España e a primeira de Galicia. Máis recentemente, a emisora puxo en marcha Noticias de A Coruña, un informativo local xerado íntegramente con intelixencia artificial, considerado o primeiro noticiario radiofónico desta natureza a nivel europeo.

A clausura do Encontro Estatal de Medios Comunitarios reuniu este sábado no espazo NORMAL da Universidade da Coruña aos participantes das xornadas para facer balance dunha edición histórica, marcada pola presenza institucional sen precedentes e a aprobación dunha folla de ruta para os próximos dous anos.

O ReMCuentro 26 puxo o punto final este sábado 18 de abril con un acto de clausura no que a bilbaina organizadora, CUAC FM, e a renovada dirección da Rede de Medios Comunitarios compartiron escenario para sintetizar tres días intensos de debate, formación e asemblea. Tras o intenso programa do venres —co coloquio inaugural sobre democratización mediática— e o sábado —coa asemblea anual da ReMC e talleres sobre intelixencia artificial e algoritmos de resistencia de Emiliano Treré—, chegou o momento de facer balance.

Paula Alonso: gratitude e recoñecemento ao voluntariado

A presidenta de CUAC FM, Paula Alonso, abriu o acto de clausura agradecendo a presenza de todas as persoas que fixeron posible o encontro, tanto as asistentes chegadas de medios de todo o Estado como o equipo de voluntarias e voluntarios da emisora coruñesa, cuxa dedicación foi clave para que o evento funcionase. Alonso reflexionou tamén sobre o valor deste tipo de encontros como espazo de reforzo dos vínculos entre os medios comunitarios, e felicitou a Manel Calbet polo seu novo cargo á fronte da ReMC.

Manel Calbet: unidade, recoñecemento a CUAC e un fito histórico

O recén elixido presidente da Rede de Medios Comunitarios, Manel Calbet, tomou a palabra para facer un chamamento á participación e á implicación de todos os medios asociados na construción colectiva da rede. Agradeceu expresamente a CUAC FM a calidade da organización do evento e subliñou un feito que considerou histórico: por primeira vez nunha asemblea da ReMC, houbo presenza de dous representantes de institucións do Goberno de España, un sinal do recoñecemento institucional que o sector está a conquistar paso a paso.

Calbet destacou tamén a aprobación, nesta mesma asemblea, dun plan de acción para os próximos dous anos, que servirá de folla de ruta para a rede. E pechou a súa intervención cunha mensaxe de optimismo e traballo en común: en grupo, e xuntos, os medios comunitarios son capaces de facer cousas que de forma illada serían imposibles.

Tres días de encontro nun ano especial

O ReMCuentro 26 celebrouse nun momento especialmente significativo para CUAC FM, que este ano conmemora o seu 30 aniversario. O encontro, que contou co respaldo do Concello de A Coruña e a Universidade da Coruña, reuniu durante o fin de semana a representantes de radios e televisións comunitarias de todo o Estado no espazo NORMAL do campus universitario.

O ReMCuentro 26 inaugurou este venres, 17 de abril de 2026, as súas xornadas no espazo NORMAL da Universidade da Coruña cun coloquio no que xornalistas, investigadores e expertas en comunicación debateron sobre os obstáculos á democratización mediática en España e Galicia: a pendente regularización dos medios comunitarios, a situación dos medios públicos galegos e os mecanismos de propagación da desinformación.

A Coruña acolleu esta tarde o acto inaugural do ReMCuentro 26, o Encontro Estatal de Medios Comunitarios organizado por CUAC FM no marco do seu 30 aniversario. A partir das 19:00 horas, o espazo NORMAL da Universidade da Coruña foi o escenario do coloquio “Democratización mediática: utopía ou realidade? Retos, barreiras e oportunidades para a transformación do ecosistema mediático”, moderado pola investigadora e co-fundadora de RICCAP Isabel Lema Blanco.

O debate contou coa participación de tres voces de referencia no ámbito da comunicación: o xornalista e historiador José Emilio Pérez Martínez, presidente da URCM e membro de RICCAP; o xornalista coruñés Alfonso Hermida Mejuto, ex-traballador da Televisión de Galicia; e Salomé Herce, xornalista, antropóloga e responsable de comunicación contra o discurso de odio e as campañas de desinformación na Secretaría de Estado de Comunicación.

A regularización pendente dos medios comunitarios

José Emilio Pérez foi directo ao sinalizar un dos principais problemas estruturais do sector: a ausencia dunha vontade política real para avanzar na súa regulación. Trala décadas de actividade das radios e medios comunitarios en España, o sector continúa á espera dun marco normativo que recoñeza e garanta o seu funcionamento en condicións democráticas.

Medios públicos galegos: un diagnóstico preocupante

Alfonso Hermida situou o foco na situación dos medios públicos galegos, que cualificou de sangrante. Na súa intervención, sinalou as importantes eivas que presentan actualmente a Radio Galega e a Televisión de Galicia, e apuntou que a tendencia non é de mellora. Como exemplo da cobertura deficiente, recordou o tratamento que fixo a TVG da vaga de lumes do pasado verán. Hermida tamén puxo de relevo a eliminación, na última lei de medios galegos, da obriga de contar cun consello de informativos na TVG, un mecanismo de garantía da independencia informativa que noutras radiotelevisións públicas é considerado esencial.

O xornalista aproveitou tamén para recoñecer o papel de CUAC FM como aliado da plataforma Defende a Galega, destacando que a emisora comunitaria coruñesa acolleu sempre con respecto as reivindicacións en defensa da lingua galega.

Desinformación: pedagoxía antes que desmentido

Salomé Herce abordou os mecanismos de propagación da desinformación e os bulos. Subliñou que, aínda que estes fenómenos non son novos, a velocidade á que se difunden hoxe está condicionada tanto polo desenvolvemento tecnolóxico e o papel dos algoritmos como por transformacións sociais e psicolóxicas na forma en que a cidadanía consume información.

Fronte ao pesimismo, Herce apostou pola pedagoxía e a educación mediática como ferramentas preventivas. Explicou a existencia dunha xanela de 24 a 48 horas para desmentir bulos de forma eficaz, pero incidiu en que a resposta reactiva non é suficiente: a clave está en construír cultura mediática desde os propios medios, antes de que os bulos ocorran, para que a cidadanía desenvolva capacidade crítica no consumo de información.

Inicio das xornadas

O coloquio inaugural supuxo o pistoletazo de saída das xornadas do ReMCuentro 26, que se desenvolverán ata o domingo 19 de abril entre o espazo NORMAL e outros espazos da Universidade da Coruña, con actividades abertas ao público.

O Encontro Estatal de Medios Comunitarios da ReMC, que se celebra na Coruña organizado por CUAC FM, acollerá un taller práctico sobre intelixencia artificial aplicada á radio comunitaria. Será unha sesión pensada para achegar estas ferramentas ao día a día das emisoras sen perder a mirada crítica sobre o seu impacto.

A intelixencia artificial está a entrar con forza en ámbitos moi diversos, tamén no da comunicación e a produción sonora. Para as radios comunitarias, que traballan con recursos limitados pero cun forte compromiso social, este cambio abre posibilidades novas ao tempo que formula preguntas importantes sobre o seu uso.

No marco do Encontro Estatal de Medios Comunitarios da rede ReMC, CUAC FM organiza o taller “IA aplicada á radio comunitaria”, unha proposta pensada para achegar estas ferramentas ás persoas que traballan en emisoras de todo o Estado, sen necesidade de coñecementos técnicos previos.

A sesión será impartida por Chema Casanova, Fernando Souto e Isa Lema, membros da propia emisora, e terá un formato participativo no que se combinarán explicacións, demostracións en directo e un espazo final de debate e posta en común.

A idea non é só mostrar ferramentas, senón tamén abrir unha conversa sobre como se están integrando estes sistemas no traballo diario das radios. Desde o apoio na redacción e tradución de contidos ata a transcrición automática de programas ou a xeración de descricións para arquivos sonoros, a IA xa está a modificar procesos que ata agora eran completamente manuais.

O taller tamén abordará cuestións clave como a privacidade dos datos, o funcionamento dos modelos na nube fronte ás opcións locais ou o papel do software libre neste novo ecosistema. Haberá espazo para reflexionar sobre ata que punto estas tecnoloxías poden complementar o traballo humano sen substituír a voz editorial das emisoras.

Un dos puntos destacados será a experiencia de CUAC FM con proxectos reais, como Las Noticias de A Coruña, considerado o primeiro noticiario xerado con intelixencia artificial no Estado. Tamén se analizará o comportamento destes sistemas con linguas como o galego e o castelán, especialmente relevante para as radios do contexto galego.

A actividade pecharase cunha demostración en directo e unha dinámica colectiva para recoller experiencias, necesidades e propostas das emisoras participantes, co obxectivo de seguir construíndo coñecemento compartido dentro da rede de medios comunitarios.

O Encontro Estatal de Medios Comunitarios, ReMCuentro 26, inaugurará as súas xornadas o vindeiro venres 17 de abril ás 18:30 horas no espazo NORMAL da Universidade da Coruña. O acto abrirá co coloquio “Democratización mediática: utopía ou realidade? Retos, barreiras e oportunidades para a transformación do ecosistema mediático”, un debate con voces de referencia do xornalismo, a historia e a investigación en comunicación.

A cidade da Coruña acollerá o vindeiro 17 de abril o ReMCuentro 26, o encontro anual da Red Estatal de Medios Comunitarios (ReMC), organizado este ano por CUAC FM no marco do seu 30 aniversario. O programa inaugural, que dará comezo ás 18:30 no espazo NORMAL da Universidade da Coruña, incluirá un acto de apertura seguido dun coloquio aberto ao público que situará no centro do debate unha pregunta clave: pode a democratización dos medios de comunicación ser algo máis ca unha utopía?

Ás 19:00 arrancará o coloquio “Democratización mediática: utopía ou realidade? Retos, barreiras e oportunidades para a transformación do ecosistema mediático”, con tres voces de referencia no ámbito da comunicación e a historia dos medios.

Alfonso Hermida Mejuto é xornalista coruñés, licenciado en Periodismo pola Universidade Complutense de Madrid. Entre 1994 e 2020 formou parte das redaccións de deportes e informativos da Televisión de Galicia (TVG), onde foi recoñecido co Premio Mestre Mateo ao mellor comunicador en 2003. Na actualidade traballa en comunicación corporativa e divulgación histórica.

Salomé Herce Lerma é xornalista, antropóloga e consultora especializada en comunicación con propósito para o cambio social, con máis de dúas décadas de traxectoria Es periodista, antropóloga y consultora especializada en comunicación con propósito para el cambio social, con más de dúas décadas de traxectoria en medios e organizacións sociales, culturais e medioambientais. Na actualidade é responsable de comunicación contra o discurso de odio e as campañas de desinformación na Secretaría de Estado de Comunicación, con sede no Palacio de la Moncloa.

José Emilio Pérez Martínez é xornalista e historiador, doutor en Historia Contemporánea e en Periodismo pola Universidade Complutense de Madrid e profesor na Universidade Complutense de Madrid. É presidente da URCM (Unión de Radios Libres y Comunitarias de Madrid) e membro de RICCAP. A súa investigación céntrase na historia da radiodifusión española, cunha especial atención ás radios libres e comunitarias, e é autor do libro La voz de las sin voz.

A moderación do coloquio estará a cargo de Isabel Lema Blanco, investigadora e profesora universitaria, co-fundadora de RICCAP (Red de Investigación en Comunicación Comunitaria, Alternativa y Participativa) e ex-presidenta de CUAC FM entre 2003 e 2006. Lema conta cunha ampla traxectoria investigadora nas políticas de comunicación e o papel dos medios comunitarios, e foi membro do consello de dirección de AMARC-Europa (Asociación Mundial de Radios Comunitarias).

A inauguración é un acto aberto ao público e constituirá o arranque das xornadas do ReMCuentro 26, que se desenvolverán ata o domingo 19 de abril entre NORMAL e outros espazos da Universidade da Coruña.