Vén de aprobarse o Real Decreto 958/2026, do 4 de novembro, polo que se adoptan medidas de impulso da tecnoloxía DAB+ no servizo de radiodifusión sonora dixital terrestre, unha desas tantas disposicións legais que pasan inadvertidas pero que son transcendentais para as persoas amantes da radio, particularmente a medio prazo.

A traxectoria da radio dixital no Estado español foi ata agora coma a historia de Pedro e o lobo. Sempre semella que chega, pero ao final nunca o fai, e dese xeito acumulamos un atraso de décadas na implantación dun servizo público que se supón que mellorará a calidade da comunicación radiofónica e que outros países da UE están a impulsar con moita máis decisión.

No eido local, este decreto nada resolve. Bota a pelota ao tellado das comunidades autónomas, deixándolles a decisión de implantar ou non a codificación DAB+. En termos de pluralidade, esta decisión é moi relevante. Simplificando moito, a diferenza será a posibilidade de recibir 6 ou 12 emisoras por cada multiplex. As emisoras de cobertura estatal emitirán en DAB+ (de xeito que caberán 24 cabeceiras de cobertura estatal), pero as CCAA poderán decidir se no seu tramo autonómico e local haberá outras 12 ou 24 emisoras. Podería pasar, por poñer un exemplo, que as persoas que vivan en Asturias teñan dereito a recibir o dobre de emisoras locais e autonómicas nos seus receptores que as que vivan en Canarias. Como pode ser?

Por suposto, nada se di sobre os criterios de adxudicación das licenzas en termos de dereitos, como adoita pasar nas disposicións de carácter técnico. Non se fala de pluralidade, nin de diversidade, nin de transparencia; só se concreta que a adopción do DAB+ non vai supoñer custos engadidos para as empresas adxudicatarias do nunca despregado DAB. Sempre é bo saber que a estas empresas este quilombo vaille saír de balde.

No que atinxe aos medios comunitarios, volve manifestarse o nulo interese en garantir o que a lexislación española establece e o que a normativa internacional recomenda encarecidamente. De novo se fala da implantación dun novo modelo radiofónico sen garantir a presenza dos medios comunitarios, deixando zonas grises que posibilitan a perpetuación do modus operandi que nos acompaña desde a entrada en vigor da Lei Xeral da Comunicación Audiovisual (LGCA) de 2010: todos os dereitos sobre o papel, pero ningún na práctica.

Resulta rechamante que, a propósito de todo o antedito, a autoridade nacional de regulación (neste caso a Comisión Nacional dos Mercados e a Competencia, CNMC) se abstivese de facerlle ao Executivo recomendación ningunha no sentido de garantir a presenza dos servizos de comunicación comunitarios sen ánimo de lucro na regulación da futura radio dixital mediante unha reserva, ou polo menos unha mención explícita, tal e como se fixo nos países da nosa contorna con mellores prácticas na materia, ou como se fai aquí coa radio pública e coa privada comercial. Seica para a administración o dereito á comunicación da cidadanía é contingente, pero garantir o negocio ou o adoutrinamento desde operadores privados é necesario. Cantando claro, nada se di de CUAC FM, nin de Radio Filispim, nin de tantas outras, pero Radio María, a COPE e a SER poden durmir ben tranquiliñas: ninguén as vai obrigar a nada, poden estar confortables na FM ata que sexa rendible apagala e, entrementres, os operadores piratas poden ir tomando posicións no novo formato para seguir repetindo o día da marmota, iso si, agora en dixital.

Esta falta de garantías, con toda probabilidade, abocará o despregamento do DAB e do DAB+ no eido local a unha intensa litixiosidade, tanto no ámbito doméstico como no europeo, que incrementará a inseguranza xurídica, obstaculizará o normal despregamento desta nova tecnoloxía, atrasará a súa implantación e redundará en prexuízo das persoas usuarias e dos operadores, sen entrar a valorar o menoscabo e a erosión dos dereitos fundamentais e das liberdades públicas que este enfoque regulamentario comporta.

Non é que chova sobre mollado, é que isto non é choiva.

A Radio dos Gatos, o programa de Aspace Coruña que se emite na CUAC FM, celebra o seu 15º aniversario con máis de 600 emisións ás costas e un novo reto: o lanzamento dos seus dous primeiros videopódcast no mes de decembro.

A Radio dos Gatos de Aspace Coruña cumpre 15 anos e estrea videopódcast en decembro

Segundo recolle La Opinión A Coruña, o proxecto radiofónico, pioneiro en Galicia e recoñecido a nivel estatal, naceu en 2011 como un taller máis da asociación e converteuse nunha ventá para dar a coñecer o seu traballo e reivindicar os dereitos das persoas con parálise cerebral. Cada venres, o programa chega á audiencia a través da CUAC FM e das redes sociais de Aspace Coruña.

Unha radio feita polos seus protagonistas

Arredor dunha vintena de persoas usuarias da entidade turnan na gravación. Elas elaboran a parrilla, buscan información, preparan as entrevistas e falan de actualidade e dereitos. Entre os convidados houbo responsables políticos, alcaldes e figuras do deporte, e todos os redactores queren ser os escollidos para entrevistalos.

Segundo o xerente de Aspace Coruña, Ricardo Iglesias, o máis bonito do proxecto non é escoitar o programa, senón ver como o traballan durante a semana.

A comunicación, sen barreiras

O programa conta con participantes que non teñen fala e usan sistemas de comunicación aumentativos e alternativos, como tabletas ou ordenadores con voz sintética. Nas emisións sempre hai alguén que emprega comunicador, e outras persoas len os seus textos nunha tableta cun teleprompter adaptado, por exemplo para quen ten discapacidade visual.

A logopeda Miriam Piñeiro explica que o traballo na radio reforza a lectoescritura, a dicción e a coordinación fonorrespiratoria. Tamén apunta o seguinte paso: seguir mellorando e personalizando as voces con intelixencia artificial, porque aínda soan moi sintetizadas.

Dos inicios modestos ao Premio Nacional Romper Barreiras

Os comezos foron humildes. Un grupo de seis persoas gravaba cun teléfono que ía pasando de man en man, e o programa escoitábase pola megafonía do centro. Todo cambiou co Premio Nacional Romper Barreiras, que permitiu mercar o equipamento de radio e deu un gran salto na gravación e na emisión, como lembra María Rivas, directora do centro de día e responsable do proxecto.

Carlos Rodríguez, que forma parte do equipo desde os inicios, resume así o cambio: “foi tremendo”. Para Jorge Santiago, a radio ten “alma, pulso e corazón”. Para María José Francos, que participa a través do seu comunicador, o que máis lle gusta é a música.

O próximo paso: o videopódcast

En decembro chegarán os dous primeiros videopódcast do proxecto, nos que colabora unha estudante en prácticas de Educación Social. Todo isto chega ademais cando Aspace Coruña se aproxima ao seu 50º aniversario, que cumprirá o 29 de xaneiro.

Non perdas A Radio dos Gatos todos os venres na CUAC FM, no 103.4 FM, en cuacfm.org e nas nosas apps gratuitas.

CUAC FM cubriu o DATAfórum Justicia, celebrado en Palexco do 21 ao 23 de outubro, con radio, vídeo e contidos propios na súa app. Un equipo dunhas 17 persoas voluntarias realizou un programa especial en directo, retransmitiu a final do DATAthon e ampliou con entrevistas para «Dataforum Xustiza» na app da emisora.

Radio, vídeo e app: así cubriu CUAC FM o DATAfórum Justicia

Do 21 ao 23 de outubro, Palexco acolleu na Coruña o DATAfórum Justicia, encontro anual dedicado á transformación dixital da xustiza. Está organizado polo Ministerio da Presidencia, Xustiza e Relacións coas Cortes, coa colaboración da Universidade da Coruña e do Concello. CUAC FM participou durante os tres días cun equipo de unhas 17 persoas voluntarias.

Especial en directo do mércores 21

A emisora realizou un programa especial en directo desde o recinto na mañá do mércores. Nel participaron Javier Hernández Díez, director do foro; Xulio Ferreiro, decano da Facultade de Dereito da UDC; Juan Cámara, profesor da área de Dereito Procesual da UDC; e as estudantes de Dereito Alicia, Paula, Laura, Alba e Rocío, da Uvigo e de Cantabria, que traballaban no reto sobre neurodivergencia e xustiza. Tamén foron entrevistados David Fraguela (NTT Data), Paco Loba (Pega), Celestino García (AMETIC), José Ignacio Latorre, físico cuántico, e Noemí Morte, médica forense e directora do Instituto de Medicina Legal e Ciencias Forenses de Galicia.

Ferreiro explicou como se xestou a chegada do foro á Coruña e destacou o carácter transversal do evento, que reúne dereito, informática, medicina e socioloxía, así como a participación estudantil, que cifrou nun 50 %, e a apertura á cidadanía. Avanzou ademais as liñas da edición: o DATAthon, o Prompathón, xuízos simulados con nenos e nenas e unha xornada cultural de peche.

Fraguela explicou como a intelixencia artificial e a robotización están a transformar a xustiza. Segundo indicou, os procedementos monitorios, que supoñen o 60 % do civil, pasaron de preto dun ano a un mes de tramitación. Engadiu que o rexistro e o reparto automáticos son agora inmediatos e situou España moi por diante da media europea no Justice Scoreboard.

Morte desmontou a imaxe televisiva da medicina forense: entre o 80 % e o 90 % do traballo realízase sobre persoas vivas, nos ámbitos da clínica forense, como a valoración da capacidade ou a atención ás vítimas de violencia. Reivindicou tamén máis visibilidade para a profesión fóra dos xulgados.

A final do DATAthon, en vídeo

O venres 23, CUAC FM retransmitiu en vídeo e en directo a final do DATAthon Justicia. Nesta competición, equipos de estudantes de distintas disciplinas presentaron propostas a tres retos: desigualdade silenciosa, infancia e xuventude, e neurodiverxencia.

Contidos adicionais na app

A cobertura incluíu ademais contidos adicionais. Desde Palexco realizouse un especial do programa Café con gotas. Na app de CUAC FM, na sección do programa «Dataforum Xustiza», están dispoñibles as entrevistas do especial do mércores e outras realizadas nos días seguintes: o 22 de outubro, a Roberto González Arranz, responsable de comunicación e marca do DATAfórum, e a Aitor Cubo Contreras, director xeral de Transformación Dixital da Administración de Xustiza; e o 23 de outubro, a Raúl Renales Agüero, xerente de Servizos de Ciberseguridade do Ministerio de Xustiza.

CUAC FM agradece o compromiso das persoas voluntarias que fixeron posible esta cobertura, un traballo colectivo que reflicte o carácter comunitario da emisora. Calquera persoa pode asociarse, apoiar e colaborar co proxecto de CUAC FM.

CUAC FM chega a Palexco con micrófonos e cámaras: este mércores 21 de outubro emitiremos en directo desde o DATAfórum Justicia, o encontro sobre datos, intelixencia artificial e transformación da xustiza que se celebra na Coruña ata o 23. O venres, ademais, retransmitiremos en vídeo o DATAthon.

CUAC FM emite en directo desde o DATAfórum Justicia

CUAC FM estará este mércores 21 de outubro no DATAfórum Justicia, que ata o venres 23 reúne en Palexco profesionais do dereito, da tecnoloxía e das institucións. Desde o propio recinto faremos un directo ás 10.00, que poderás seguir en cuacfm.org e no 103.4 FM ademais de en video na nosa web e na canle de Twitch.

O programa chega á súa quinta edición cun formato máis amplo: 180 expertos nacionais e internacionais e máis de 200 actividades entre relatorios, mesas de debate, cursos, talleres e videopodcasts. Entre as voces anunciadas están Alberto Gago, director xeral da Axencia Española de Supervisión da Intelixencia Artificial (AESIA); o físico cuántico José Ignacio Latorre; o catedrático de Dereito Procesual Jordi Nieva Fenoll; e a enxeñeira de IA Alba Meijide. Na parte cultural participan a humorista Carolina Iglesias, o guionista Carlos Montero e a violoncelista Alejandra Díaz.

O programa de CUAC, Café con gotas emitirá tamén o mércores ás 16.00 unha edición especial desde o Palexco.

O DATAthon, en vídeo o venres

O venres 23 retransmitiremos en vídeo o DATAthon Justicia 2026, onde máis de 100 estudantes e persoas profesionais novas de distintas disciplinas traballan en equipos sobre tres retos: desigualdade silenciosa, infancia e xuventude, e neurodiversidade. Un xurado valorará as propostas e outorgará dous premios de 1.000 euros: á mellor solución de viabilidade técnica e á máis innovadora. Este ano estrea tamén o Prompathón, dedicado ao uso da IA con documentos xudiciais anonimizados, cun terceiro premio de 1.000 euros.

Como seguir o evento

O DATAfórum Justicia ten acceso gratuíto mediante inscrición previa e está en Palexco (Peirao dos Transatlánticos, s/n).

CUAC FM pon en marcha o Arquivo Sonoro, un espazo aberto onde escoitar, ler e buscar dentro dos miles de episodios que a emisora comunitaria da Coruña leva emitido desde 1996. Cada programa procesado inclúe unha transcrición sincronizada co audio e un resumo xerado automaticamente, sen rexistro nin pagamento. O proxecto foi desenvolvido pola propia Coordinadora de Tecnoloxía da emisora.

Unha memoria que estaba espallada

CUAC FM emite desde 1996 e, co paso dos anos, acumulou miles de episodios. Primeiro gardáronse en soportes físicos, despois en arquivos persoais de cada programa e, desde 2015, nun catálogo centralizado en RadioCo. O que vén de antes está disperso en mini-discs, cassettes, discos duros e contas de iVoox: unha memoria descentralizada que nunca chegou a reunirse.

O Arquivo Sonoro é a tentativa de abrir todo ese material, aos poucos. Non é un podcast máis, senón un arquivo no que se pode buscar dentro do emitido.

Que ofrece cada episodio

Cada episodio procesado inclúe tres cousas:

• Un resumo xerado automaticamente.
• A transcrición sincronizada co audio.
• Ligazóns á orixe en RadioCo.

O acceso é libre, sen rexistros nin paywalls, para calquera persoa oínte, lectora, estudosa ou curiosa. As transcricións axudan tamén a facer accesibles os programas ás persoas con discapacidade auditiva.

Como se constrúe

Un proceso continuo consulta a API de RadioCo, descarga o podcast de cada episodio, transcríbeo cun modelo local e xera despois o resumo cun modelo de linguaxe. A transcrición faise co modelo aberto faster-whisper large-v3-turbo, na CPU dun equipo de sobremesa e a razón de 12 minutos por episodio. Os resumos pídense a unha API externa. O sistema detecta automaticamente se un programa está en galego, en castelán ou é bilingüe, e aplica correccións de nomes propios nun paso posterior, como distinguir “CUAC FM” do homófono “Quack FM”. Os modelos e as regras axústanse a medida que aparecen erros recorrentes.

Transcricións automáticas: con cautela

As transcricións poden conter erros ou omitir pasaxes filtradas como silencio ou música, e non son textos oficiais nin editoriais. O audio orixinal, os textos e os nomes dos programas pertencen ás súas autoras e autores e á propia CUAC FM. Calquera uso máis alá da escoita persoal ou a cita académica require o permiso de quen fai o programa.

Axúdanos a recuperar o arquivo

A emisora pide colaboración a quen participou nun programa antes de 2015 e conserva grabacións, así como a quen colgou episodios en plataformas como iVoox que aínda non forman parte do arquivo. Tamén interesan MP3, mini-discs ou cassettes do paso por CUAC FM. Quen queira achegar material pode escribir a tecnoloxia@cuacfm.org.

O Arquivo Sonoro está dispoñible en cuacfm.org/arquivo-sonoro.

Desde o dimingo ás 10, poderanse retirar a través de Ataquilla, os convites gratuítos para a gala de humor “Vellenials e ImproCoruña” que CUAC FM celebra o sábado 10 de outubro no Auditorio de Afundación da Coruña, dentro dos actos do seu 30 aniversario.

CUAC FM, a radio comunitaria da Coruña, abre a retirada de convites para a súa gran gala de humor en directo, co título “Noitiña de risas con Vellenials… e moito máis”. O evento terá lugar o sábado 10 de outubro, ás 20:00 horas, no Auditorio de Afundación, no Cantón Grande da Coruña.

Os convites, de balde, xa están dispoñibles na plataforma Ataquilla, desde o domingo 4 de outubro ás 10:00 horas.

Sobre o escenario xuntaranse dous dos proxectos de humor máis queridos da escena coruñesa: Vellenials, un dos programas da grella de CUAC FM que está a piques de estrear a súa 6ª tempada, sae do estudio para ofrecer unha noite de risas en directo; e ImproCoruña, formado por Lucía Veiga, Marita Martínez e Patricia Castrillón, que porá o seu selo de improvisación á velada.

O acto enmárcase na programación do 30 aniversario de CUAC FM, que a emisora está a celebrar ao longo de toda a tempada, e conta coa colaboración do Concello da Coruña.

CUAC FM é a radio comunitaria da Coruña, declarada entidade de utilidade pública, que leva tres décadas de emisión en formato asociativo e sen ánimo de lucro, dispoñible na 103.4 FM e en todo o mundo a través da súa app gratuíta e sen publicidade.

O equipo de Radio50yPico desprazouse o pasado martes 29 de setembro ata Vigo para realizar un especial sobre Antón Beiras García, oftalmólogo, humanista e inventor do Vigoscopio. No edificio Redeiras da Universidade de Vigo, o programa de CUAC FM cubriu o acto en memoria do investigador e entrevistou o seu fillo, Antón Beiras Cal.

O pasado martes 29 de setembro, ás 19:00 horas, o edificio Redeiras da Universidade de Vigo, situado no Berbés, acolleu a actividade «A mirada certera», dedicada a recuperar a figura e a traxectoria científica do doutor Antón Beiras García (Santiago, 1916 – Vigo, 1968). A cita incluíu a proxección do documental que lle dá nome e foi presentada por Alejandro Otero, colaborador de Beiras na construción do Vigoscopio, e polo seu fillo, Antón Beiras Cal.

Unha investigación nacida de motivos persoais

Segundo recolle a prensa local, Beiras comezou a investigar a mediados dos anos cincuenta, despois de que a súa filla Antía fose diagnosticada de estrabismo. Dese traballo, desenvolvido desde Vigo, naceu o Vigoscopio, tamén coñecido como Sinoptóforo de TV, un dispositivo para estudar e tratar esta alteración da visión. A investigación espertou o interese da Universidade de Columbia, que manifestou a súa intención de continuar os estudos nos seus laboratorios.

Ciencia en galego durante o franquismo

A dimensión científica de Beiras non se entende sen o seu compromiso coa lingua. En 1958 publicou Ensaios para mellorar os resultados terapéuticos do estrabismo, a primeira publicación científica en galego desde a Guerra Civil. Galeguista convencido, defendeu o idioma e a identidade do país nos anos máis difíciles da ditadura.

A memoria que conservou a familia

O acto puxo tamén en valor o legado persoal do doutor. A súa esposa, a pedagoga Antía Cal Vázquez, conservou durante décadas a documentación relacionada co Vigoscopio, o que permitiu recuperar esta historia de ciencia, innovación e memoria.

A voz do fillo

Radio50yPico entrevistou a Antón Beiras Cal, fillo de Antón Beiras García. A entrevista completa poderá escoitarse no próximo episodio do programa.

O grupo malagueño Solzimer alzouse co primeiro premio, dotado con 1.000 euros, na Batalla de Bandas do XXVIII Concurso de Bandas e Solistas de CUAC FM, celebrada este sábado na Sala Mardi Gras da Coruña. O segundo posto, con 900 euros de recompensa, foi para o proxecto barcelonés Vlack Carmen. Aínda queda por coñecerse o nome da banda local gañadora do premio Eva Coyote.

A Sala Mardi Gras acolleu o pasado sábado 19 de setembro a Batalla de Bandas do XXVIII Concurso de Bandas e Solistas de CUAC FM, coa participación de dous proxectos chegados de lonxe —Málaga e Barcelona— que competiron polo primeiro posto, dotado cun premio de 1.000 euros.

Tras as actuacións de Solzimer e Vlack Carmen, seleccionados polo xurado entre as 120 bandas que se presentaron a esta edición do concurso, o xurado decidiu conceder o primeiro premio a Solzimer, de Málaga. Vlack Carmen, pola súa banda, levou o segundo premio, dotado con 900 euros.

Aínda está por desvelar o nome da banda gañadora do premio Eva Coyote á Mellor Banda Local, que se dará a coñecer proximamente.

Dende CUAC FM agradécese á Área de Cultura da Deputación da Coruña o seu apoio económico, que permite que este concurso siga sendo un impulso para os proxectos musicais emerxentes. O agradecemento esténdese tamén ao público asistente e á Sala Mardi Gras.

CUAC FM 103.4 estrea nova tempada cunha grella renovada. O cambio máis visible chega pola mañá, coa incorporación en directo de La Cafetera de 8.30 a 10.00, e pola noite, co traslado de Carne Cruda ao horario de madrugada. Pero o groso da grella segue a ser, coma sempre, produción propia: máis de trinta programas feitos por e para a comunidade, entre os que estrean esta tempada El Kiosko de la Radio, Latido Jaime e Artéxtasis.

CUAC FM encara a nova tempada cunha grella renovada. O cambio máis destacado é a creación dun bloque informativo que arrinca ás 8.00 da mañá, no que se incorpora a emisión en directo de La Cafetera, o espazo de actualidade de radiocable.com dirixido por Fernando Berlín, entre as 8.30 e as 10.00. Poderase seguir tanto a través do 103.4 FM como da app de CUAC FM. Pola noite, Carne Cruda, o programa de información política e social de Javier Gallego, múdase á franxa de late night, ocupando agora o espazo de madrugada.

Máis aló destes dous axustes, a nova grella dá continuidade —e protagonismo— á ampla produción propia de CUAC FM, con programas que cobren dende a actualidade e a cultura ata a música, a ciencia ou o motor.

Os luns, Acrobacias sobre un Queso Rancio achega humor absurdo ás 17.00; DJ Gaby Oro repasa todos os estilos e épocas da música ás 18.00; e El Desinformativo, en emisión dende 2004, ofrece crítica social e política ás 20.00.

Os martes, Onda Ciencia trae divulgación científica da man da UDC ás 13.00; Escuela de Familias, o espazo de sensibilización do voluntariado promovido por Accem, emite ás 16.00; A Fume de Carozo, feito polo alumnado do Colexio Calasanz para fomentar a oralidade en galego, ás 17.00; Recendo, o maxazine cultural da Agrupación Cultural Alexandre Bóveda, ás 19.00; Enworking, sobre psicoloxía positiva aplicada ao benestar, ás 20.00; e como estrea desta tempada, Latido Jaime, un espazo de conversas persoais e íntimas, ás 21.00.

Os mércores, Radio 50 y Pico, proxecto da Federación Galega de Asociacións Universitarias Sénior (FEGAUS), ocupa a franxa das 12.00 e amplia duración a dúas horas; Café con Gotas achega entrevistas, música e axenda cultural ás 16.00; Alegría combina entrevistas e actualidade ás 19.00; Frecuencia Electrónica pon a música electrónica ás 20.00; e Simplemente Gente fala de diversidade cultural e dereitos das persoas migrantes ás 21.00.

Os xoves, El Orador trae os seus debates ao estilo parlamentario da man da asociación AUDC ás 17.00; Estrelados na Estratosfera trase as mellores entrevistas ás 18.00; Radio Relatos, coa narrativa oral en primeira persoa, ás 19.00; en Ecuación resolven multitude de ecuacións, ás 20.00; Cuak’n’Roll, con rock, blues e folk afastados das radiofórmulas, ás 21.00; Vellenials, humor en galego, ás 22.00; e Escape Motor, referencia informativa do mundo do motor, ás 23.00.

Os venres, Radio en Ruta, feito polo alumnado do programa Ruta da Fundación Amador de Castro, emite ás 10.00; Trecépolis propón unha viaxe polas músicas do mundo ás 16.00; La Taberna de la Verdad trata temas variados con ton cómico e reflexivo ás 18.00; Mi Rollo es el Rock ás 19.00; Velaí Vai, humor e reflexións sobre a vida cotiá, ás 20.00; e Sueños Diabólicos, cinefilia sen filtros, ás 22.00.

Os sábados, Orión trae rock e heavy con entrevistas a bandas galegas ás 11.00; Saficonas, o podcast sobre o colectivo LGTBIQ+ en colaboración con Les Coruña, ás 12.00; Malhumorhadas toman o relevo, ás 13.00; Desde 1m Más Abajo, onde se entrevista a rapaces novos sobre a súa visión da vida das persoas maiores, ás 19.00; e Music Box, música electrónica presentada por Iván Pérez, ás 20.00.

E os domingos, coma estrea desta tempada, El Kiosko de la Radio, magazine matutino que conecta a Coruña de onte coa de hoxe, ás 11.00; Radio Parafuso, centrado na saúde mental, ás 12.00; Nubes de Papel, sobre literatura, arte e cultura, ás 20.00; a tamén estrea Artéxtasis, adicado á arte e á música en directo, ás 18.00; e Circo Pirata, música e humor, ás 23.00, para pechar a semana.

A grella completa, con todos os horarios, xa está dispoñible na web e na app de CUAC FM. Escoita a radio comunitaria da Coruña sintonizando a 103.4FM e en calquera parte do mundo desde as nosas app gratuitas, a mellor calidade de audio sen publicidade.

O programa Escape Motor de CUAC FM realizará unha emisión especial en directo este sábado 5 de setembro, narrando en directo o II Rally Terra de Galicia dende as 08.00h ata aproximadamente as 20.30h. A proba, puntuable para o Campeonato de España de Rallyes de Tierra (CERT), percorrerá varios concellos da comarca de Bergantiños e arredores.

CUAC FM 103.4 vai vivir unha xornada especial este sábado 5 de setembro coa emisión en directo de Escape Motor, que se despraza ata o Rally Terra de Galicia para narrar de primeira man toda a acción da proba. A emisión comezará ás 08.00h e prolongarase ata as 20.30h aproximadamente, cubrindo así toda a xornada de tramos cronometrados do sábado.

O Rally Terra de Galicia, na súa segunda edición, é unha proba puntuable para o Campeonato de España de Rallyes de Tierra (CERT) e discorre por concellos como Arteixo, Carballo, Cerceda, A Laracha, Malpica, Coristanco, Ponteceso e Tordoia, cun percorrido total de 358 quilómetros.

Podedes seguir a emisión en directo a través da 103.4FM se está na Coruña e en calquera parte do mundo na nosa app gratuita. Radio Cerceda conectará con CUAC FM polo que tamén será posible seguir o directo a través da súa emisión.