Hoxe, xoves 29 de Xaneiro pechando as actividades de 2016, CUAC FM proxectará o documental “10 anos de Radio Filispim” as 20 horas no Local da Asociación Cultural Alexandre Bóveda na Coruña na Rúa Olmos 18 1º andar con entrada libre.

A proxección deste documental seguiralle unha charla coloquio cos compoñentes da nosa emisora irmá da Terra de Trasancos

Unha vez rematada a proxección, sobre as 21:45-22:00 organizarase o clásico brindis para despedir o ano no local “A Franxa”, situado na rúa da Franxa nº32.

Se non podes asistir, que teñas un gran 2017, escóitanos nas ondas.

O venres 15 de abril ás 20 horas terá lugar a segunda charla do “Observatorio da Comunicación” que organiza CUAC FM con motivo do seu XX aniversario. A entrada é totalmente libre ata completar aforo.

Será na Sede da A. C. Alexandre Bóveda (Rúa Olmos 20, A Coruña) que comparte CUAC FM coa citada Asociación.

O convidado nesta ocasión será Xosé Mexuto, director de “Sermos Galiza“, e a súa charla titúlase “Os medios de comunicación en Galicia, unha visión alternativa“.

Quen e Xosé Mexuto?

Exerce o xornalismo desde 1987. Traballou nas redaccións de El Ideal Gallego e La Voz de Galicia. Foi  correspondente de Efe na Coruña, xefe de prensa do BNG no Congreso dos Deputados no período 1996-2004 e despois xefe de prensa nacional do BNG no período 2004-2012.

Foi colaborador de Xornal.Com e de Xornal de Galicia. Son director de Sermos Galiza desde xaneiro de 2013.

Formou parte do Consello de Administración da CRTVG, en representación do Parlamento da Galiza a proposta do BNG.

É tamén co-autor do libro “Historia do Deportivo” (Xerais), co-escrito con Jesús Flores, e autor de “A Nación Negada-Conversas con Francisco Rodríguez” (A Nosa Terra).

O xornalista lucense DAVID LOMBAO @DavidLombao, director do xornal dixital Praza Pública, será o primeiro participante do ciclo de conferencias nomeado “Observatorio da Comunicación” que CUAC está a organizar no seu XX cumpreanos e que comezará o vindeiro xoves 18 ás 20:00 no local social que CUAC comparte coa AC Alexandre Bóveda.

David Lombao participará nun coloquio co público asistente no que tratará de analizar a situación do sector da comunicación en Galicia, como representante dun dos novos medios galegos e dixitais que naceron durante a actual crise.

O observatorio da Comunicación.

O panorama nos medios de comunicación mudou fondamente nos últimos anos. Os motivos que provocaron este cambio están relacionados coa crise económica que golpeou fortemente ao sector da comunicación e da información. Tamén foi provocado pola cidadanía que demanda uns medios diferentes, cunha maior independencia económica e política, ao mesmo tempo que busca unha información máis especializada e cunha análise máis rigorosa.

Do mesmo xeito, os cambios na lexislación vixente, sirva de exemplo a chamada Lei Mordaza, poden trastornar o modo no que os xornalistas veñen desenvolvendo a súa actividade. Tampouco podemos esquecer que os medios comunitarios seguen traballando para que se recoñeza o seu valor e o seu dereito a comunicar. Se a todo isto lle engadimos a irrupción de novas ferramentas dixitais para a comunicación que, aínda non sendo estritamente novidosas, seguen a alterar os métodos tradicionais, temos o bosquexo da nova situación que afrontan os medios de comunicación.

Dende CuacFm cremos que está situación require dunha análise en profundidade e que non hai ninguén máis indicado para realizalo que os propios medios. É por isto que propoñemos un ciclo de conferencias/palestras na que convidaremos a diferentes medios e asociacións do mundo da comunicación, para que compartan a súa lectura da situación así como as súas estratexias para enxergar cara onde camiña o sector da información e da comunicación.